क्षेत्रीय अधिकारी , मायक्रो ऑब्झर्व्हर , क्रेंद्राध्यक्ष , मतदान अधिकारी , पोलीस मिळून २३२४ कर्मचारी तैनात ; दिव्यांग व्यक्तींसाठी व लहान मुलांसाठी पाळणाघराची व्यवस्था ..
कणकवली दि. ६ मे ( भगवान लोके )
रत्नागिरी-सिंधुदुर्ग लोकसभा मतदार संघासाठी मंगळवारी ७ मे रोजी मतदान होणार आहे. ३३२ मतदान केंद्रांवर ही मतदान प्रक्रिया पार पाडण्यासाठी प्रशासन सज्ज झाले असून सोमवारी २० टेबलवरून साहित्य वाटप करण्यात आले. ही मतदान प्रक्रिया पार पाडण्यासाठी क्षेत्रीय अधिकारी , मायक्रो ऑर्ब्झवर , क्रेंद्राध्यक्ष , मतदान अधिकारी , पोलीस मिळून २३२४ कर्मचारी नेमणूका करण्यात आल्या आहेत. दिव्यांग व्यक्तींसाठी व लहान मुलांसाठी पाळणाघराची विशेष व्यवस्था करण्यात आली असून कर्मचारी मतदान साहित्य घेवून ४५ एसटी, ५ जीप गाड्यांच्या मदतीने कणकवली , देवगड व वैभववाडी तालुक्यातील विविध मतदान केंद्रांवर रवाना झाले आहेत.
कणकवली महाविद्यालयाच्या पटांगणावर मतदान साहित्य वाटप प्रक्रीया सोमवारी पार पडली. यावेळी सहायक निवडणूक निर्णय अधिकारी तथा प्रांताधिकारी जगदीश कातकर , कणकवली तहसिलदार दीक्षांत देशपांडे , वैभववाडी तहसिलदार सूर्यकांत पाटील, देवगड तहसिलदार संकेत यमगर आदींसह अधिकारी व कर्मचारी उपस्थित होते. अतिरिक्त जिल्हा पोलिस अधीक्षक कृषिकेश रावले ,उपविभागीय पोलिस अधिकारी घनश्याम आढाव यांनी भेट देऊन प्रक्रियेची पाहणी केली. दरम्यान , कायदा व सुव्यवस्था राखण्यासाठी पोलिस प्रशासन सज्ज झाले आहे. मतदान प्रक्रीया शांततेत पार पडावी यासाठी सर्वोतोपरी काळजी घेण्यात येत आहे.
कणकवली विधानसभा मतदार संघात – ३३२ मतदान केंद्र असून २०टेबल वरून मतदान साहित्य वितरित करण्यात आले. २३२४ निवडणूक कर्मचारी, त्यात पोलिसांसह ४७ झोनल अधिकारी , ३८ मायक्रो ऑब्झर्व्हर , ४५ एसटी , ५ जीप , या गाड्यांच्या मदतीने ३३२ केंद्रांपैकी प्रत्येक मतदान केंद्रावर मतदान केंद्राध्यक्ष , मतदान अधिकारी एक, दोन व तीन, पोलिस कर्मचारी तसेच दिव्यांगांसाठी स्वयंसेवक, पाळणाघरासाठी अंगणवाडी अथवा आशा स्वयंसेविका व व्यवस्थापक तैनात असणार आहेत.
विशेष मतदान केंद्र –
वागदे येथील ३०७ क्रमांकाचे मतदान केंद्रावर सर्व महिला कर्मचारी असणार आहेत. ओसरगाव येथील ३३२ क्रमांकाच्या मतदान केंद्रावर दिव्यांग कर्मचारी असतील.तर देवगड तालुक्यातील जामसंडे येथील मतदान केंद्रावर युवा कर्मचारी असणार आहेत. ३३२ मतदान केंद्रांच्यापैकी ५० टक्के मतदान केंद्रे ही लाईव्ह वेब कास्टींगने जोडण्यात आली आहेत.
