मालवण ,दि.१७ डिसेंबर
मालवण येथील दिवाणी न्यायालय येथे शनिवारी राष्ट्रीय लोकअदालतीचे आयोजन करण्यात आले होते. या राष्ट्रीय लोकअदालतीमध्ये मालवण येथील दिवाणी न्यायालयातील प्रलंबित प्रकरणांपैकी १७ प्रकरणे व वादपूर्व प्रकरणांतील २९ प्रकरणे तसेच पोलिसांकडील वाहतूक शाखेकडील ई-चलन १ प्रकरण अशी मिळून एकूण ४७ प्रकरणे तडजोडीने मिटवून निकाली काढण्यात आली. प्रलंबित, वादपूर्व व ई-चलनमधील एकूण रक्कम १,४१,८७४ रुपये एवढी झाली आहे. या लोकन्यायालयात मालवण तालुक्यातील राष्ट्रीयकृत बँका, ग्रामपंचायत, राज्य वीज वितरण कंपनी तसेच वाहतूक पोलिसांमार्फत ई-चलन प्रकरणे अशी वादपूर्व प्रकरणे ठेवण्यात आली होती.
या लोकन्यायालयासाठी एक पॅनेल बनविण्यात आले होते. पॅनेलप्रमुख म्हणून दिवाणी न्यायाधीश, मालवण तथा तालुका विधी सेवा समिती, मालवणचे अध्यक्ष एम. आर. देवकते यांनी काम पाहिले. विधीज्ञ एस. के. जाधव यांनी पॅनेल सदस्य म्हणून काम पाहिले. तसेच न्यायालयाचे कर्मचारी सहाय्यक अधीक्षक एस. एन. पालव, लघुलेखक डी. डी. तिबिले, वरिष्ठ लिपीक यू एन. मालणकर, कनिष्ठ लिपीक ओ. एस. हळदणकर, एस. व्ही. परब, एल. आर. कांबळी, सी. एम. गोसावी, एस. व्ही. जाधव तसेच चपराशी एच. व्ही. कामतेकर व एस. बी. चिंदरकर यांचे सहकार्य लाभले.
