वर्षा झालटे ; मच्छीमारांच्या एक दिवसीय कार्यशाळेस उत्स्फूर्त प्रतिसाद…
मालवण,दि. २० डिसेंबर
सहकारातुन राष्ट्रीय सहकार विकास निगम महामंडळाच्या माध्यमातून निलक्रांती अधिक प्रभावशाली करता येईल असे प्रतिपादन तहसीलदार वर्षा झालटे यांनी येथे केले.
लक्ष्मणराव इनामदार नैशनल अकॅडमी फॉर को ऑपरेटिव्ह रिसर्च अँड डेव्हलपमेंट प्रशिक्षण केंद्र एनसीडीसी पुणे, सहकार मंत्रालय, भारत सरकार आणि मत्स्यव्यवसाय विभाग भारत सरकार व मत्स्यव्यवसाय विभाग, सिंधुदुर्ग यांच्या संयुक्त विद्यमाने बॅ. नाथ पै सेवांगण येथे मच्छीमारांसाठी एक दिवसीय प्रशिक्षण कार्यशाळा आयोजित करण्यात आली होती. प्रधानमंत्री मत्स्यसंपदा योजने अंतर्गत आयोजित कार्यशाळेला महाराष्ट्र शासनाच्या मत्स्यव्यवसाय विभागाचे सहाय्यक आयुक्त मत्स्यव्यवसाय सागर कुवेसकर, राष्ट्रीय सहकार विकास निगमचे प्रादेशिक संचालक विनीत नारायण तसेच जिल्ह्यातील मच्छिमार मोठ्या संख्येने उपस्थित होते.
जिल्हा कार्यक्रम व्यवस्थापक बहर महाकाळ यांनी प्रास्ताविक करून स्वागत केले.
यावेळी तहसीलदार झालटे यांनी विविध शासकिय योजनांचा लाभ घेऊन आपल्या संस्थेचे बळकटीकरण व विस्तार करण्याचा प्रयत्न करावा असे आवाहन केले. श्री. नारायण यांनी सहकारी संस्थांनी पुढाकार घेऊन केंद्राच्या विविध योजनांचा लाभ कसा घेता येईल याबद्दल मार्गदर्शन केले. केंद्राच्या नवीन धोरणानुसार सिंधुदुर्ग जिल्ह्यातील मच्छिमार हा खोल समुद्रातील मासेमारी करण्यास १२ ते २०० समुद्र मैल पर्यंत मासेमारी करिता जाऊ शकतो. मत्स्यव्यवसायात महिलांचे प्रमाण अत्यल्प असून महिलांनी एकत्र येऊन मत्स्यसंस्था स्थापन करायला हव्यात, अशी अपेक्षा व्यक्त केली.
मत्स्य शेतकरी उत्पादक संस्थांसाठी असलेल्या विविध योजनासाठी प्रस्ताव कसे तयार करावयाचे या संदर्भात राज्य मच्छीमार सहकारी संघ अधिकारी सुरज यलपाले यांनी मार्गदर्शन केले.
प्रशिक्षणा दरम्यान मच्छीमार बांधवांसाठी झालेल्या सादरीकरणामध्ये महेश कडलग यांनी राष्ट्रीय सहकारी विकास महामंडळाच्या विविध योजनांची माहिती दिली. महाराष्ट्र शासनाच्या मत्स्य व्यवसाय विभागाच्या विविध योजनांबाबत सागर कुवेसकर यांनी उपस्थित मच्छीमार संस्थांना मार्गदर्शन केले.
श्री. कडलग यांनी आभार मानले. या एक दिवसीय कार्यशाळेला विविध मच्छीमार संस्थेच्या मच्छीमार प्रशिक्षणार्थी यांचा उत्तम प्रतिसाद मिळाला.
