सावंतवाडी, दि. २५ डिसेंबर
अखिल भारतीय विद्यार्थी परिषदेचे कोकण प्रांत अधिवेशनाला भाजपचे राष्ट्रीय महासचिव विनोद तावडे, माहिती तंत्रज्ञान मंत्री आशिष शेलार, मस्य व बंदर विकास मंत्री नितेश राणे उपस्थित राहणार असून उद्या दि.२६ डिसेंबर रोजी सायंकाळी आद्य पत्रकार बाळशास्त्री जांभेकर कला दालन शुभारंभ होणार आहे. दि.२७ ते २९ डिसेंबर रोजी अधिवेशन भोसले नाॅलेज सिटी येथे आयोजित करण्यात आले आहे.
अखिल भारतीय विद्यार्थी परिषदेचे ५९ वे कोकण प्रांताचे अधिवेशन २७ ते २९ डिसेंबर ला यशवंतराव भोसले नॉलेज सिटी चराठा येथे होत आहे. या अधिवेशनाचे उद्घाटन दि .२७ डिसेंबर रोजी सकाळी ११ वाजता केंद्रीय विद्यापीठ अनुदान आयोगाचे सचिव मनीष जोशी यांच्या हस्ते होणार आहे तर समारोप दि .२९ रोजी संध्याकाळी पाच वाजता सावंतवाडी गांधी चौक येथे जाहीर सभेने होणार आहे.
या अधिवेशनाला भाजपाचे राष्ट्रीय महासचिव विनोद तावडे, मंत्री आशिष शेलार ,मत्स्य व बंदर विकास मंत्री नितेश राणे उपस्थित राहणार आहेत अशी माहिती अखिल भारतीय विद्यार्थी परिषदेचे महामंत्री संकल्प फळदेसाई व स्वागत समिती सचिव अतुल काळसेकर यांनी पत्रकार परिषदेत दिली. यावेळी चिन्मयी प्रभूखानोलकर उपस्थित होत्या.
श्री फळदेसाई म्हणाले, अधिवेशनाच्या पूर्वसंध्येला २६ डिसेंबर रोजी सायंकाळी सहा वाजता आद्य पत्रकार बाळशास्त्री जांभेकर कला दालनात प्रदर्शनाचे उद्घाटन होईल. या प्रदर्शनामध्ये कोकणातील लोककलांचा समावेश असणार आहे. या प्रदर्शनाचे उद्घाटन ठाणे जनता सहकारी बँकेचे अध्यक्ष शरद गांगल व भोसले नॉलेज सिटी चे कार्याध्यक्ष अच्युत सावंत भोसले यांच्या हस्ते होणार आहे.
भोसले नाॅलेज सिटी येथे शुक्रवार दि.२७ डिसेंबर रोजी ध्वजारोहणाने सकाळी अकरा वाजता प्रांत अधिवेशनाला सुरुवात होणार आहे. या अधिवेशनाचे उद्घाटन उद्घाटन विद्यापीठ अनुदान आयोगाचे सचिव मनीष जोशी व मत्स्य व बंदर विकास मंत्री नितेश राणे यांच्या हस्ते होणार आहे.
या अधिवेशनाची टॅग लाईन विकसित कोकण समृद्ध कोकण अशी आहे. अधिवेशन स्थळाला अहिल्याबाई होळकर नगरी तर सभागृहाला पुण्यश्लोक बापूसाहेब महाराज यांचे नाव देण्यात आले आहे. या अधिवेशनात परिसंवाद होणार आहेत त्यामध्ये नवीन शैक्षणिक धोरण, संविधान, सागरी सुरक्षा, शेती व फळ प्रक्रिया, व्यापार, पर्यटन, नवीन तंत्रज्ञान, बँकिंग व उद्योग व्यवसाय या संदर्भात मार्गदर्शन होणार आहे.
शनिवार दि.२८ डिसेंबर रोजी विविध विषयावर परिसंवाद व चर्चासत्र होणार आहे. यामध्ये विविध प्रांतातून आलेले विद्यार्थी सहभागी होणार असून त्यांना तज्ञ मार्गदर्शन करणार आहेत तर २९ डिसेंबर रोजी अधिवेशनाचा समारोप होणार आहे. या समारोपाच्या दिवशी सावंतवाडी शहरात संध्याकाळी चार वाजता शोभायात्रा निघणार आहे. यामध्ये हजारोच्या संख्येने विद्यार्थी सहभागी होणार आहेत. शोभायात्रा सावंतवाडी शहरातील विविध भागातून निघणार आहे त्याची सांगता गांधी चौक येथे सांगता सभेने होणार आहे.अखिल भारतीय विद्यार्थी परिषदेचे राष्ट्रीय पदाधिकारी शिवानी खरवाल या उपस्थित राहून मार्गदर्शन करणार आहेत. तत्पूर्वी नवीन प्रांत कार्यकारणी घोषित करण्यात येणार आहे. तसेच विविध प्रस्ताव ठेवून त्यावर चर्चा होणार आहे.
या अधिवेशनाला पालघर ते गोवा या कोकण प्रांतातील एक हजार विद्यार्थी सहभागी होणार आहेत. या अधिवेशनाची भोसले नॉलेज सिटी येथे जय्यत तयारी करण्यात आली आहे. विद्यार्थी परिषद कोकण प्रांत अधिवेशन निमित्ताने विविध पातळ्यांवर उपक्रम हाती घेतला जात असून कोकण विकासाची स्वप्ने ठेवून ठराव मंजूर करण्यात येणार आहेत असे अतुल काळसेकर यांनी बोलताना सांगितले.
