वेंगुर्ला,दि.१७ फेब्रुवारी
उभादांडा येथील मानसीश्वराचा जत्रौत्सव आज मोठ्या भक्तीमय वातावरणात बहुसंख्य भाविकांच्या उपस्थितीत सुरु आहे. या जत्रौत्सवाच्या पार्श्वभूमीवर गेले काही दिवस मंदिराच्या आजूबाजूला दुकानांसाठी छोटे-मोठे मंडप उभारुन विक्रेत्यांनी आपली जागा निश्चित केली होती. जत्रोत्सवाच्या आदल्यादिवशीपासून काही दुकाने सुरु झाल्याने याठिकाणी जत्रोत्सवाचा माहोल निर्माण झाला होता. आज शनिवारी पहाटेच जत्रोत्सवाला सुरुवात करण्यात आली. सुरुवातीला मानाची निशाणे अर्पण केल्यानंतर उर्वरित भाविकांनी केळी, नारळ, निशाणे अर्पण करण्यास सुरुवात केली. जत्रौत्सवानिमित्त नारळ, केळी, निशाणे याबरोबरच विविध खेळणी, गृहपयोगी वस्तू, मिठाई, हॉटेल्स यांची दुकाने मोठ्या प्रमाणात मांडण्यात आली आहेत. देवदर्शनानंतर भाविकांनी येथील विविध दुकानांना भेटी देत असून मोठ्या प्रमाणात खरेदी करीत खाद्यपदार्थांचा आस्वाद लुटत आहेत.
दोन दिवस शाळा, शासकीय कार्यालये यांना सुट्टया आल्यामुळे मुंबईस्थित चाकरमान्यांनीही हजेरी लावली आहे.
