कोल्हापूर, दि. २५ सप्टेंबर
सावंतवाडी उपजिल्हा रुग्णालयातील ट्रामा केअर युनिट, वैद्यकीय अधिकारी यांची रिक्त पदे, रक्तपेढी यासंदर्भात आरोग्य विभागाच्या सचिवांनी लक्ष घालावे. आरोग्य विभागाला ही आता शेवटची संधी अशा शब्दात न्यायमूर्ती एम.एस. कर्णिक यांनी आरोग्य विभागाला निर्देश दिले.
ट्रामा केअर युनिट साठीची वैद्यकीय अधिका-यांची पाच पदे रिक्त ठेऊन सावंतवाडी चे ट्रामा केअर युनिट चालते कसे;.असा प्रश्न न्यायमूर्ती शर्मिला देशमुख यांनी उपस्थित केला. यासंदर्भात आरोग्य विभागाने तातडीने कार्यवाही करावी अशा सूचना कोल्हापूर खंडपीठाचे न्यायमूर्ती कर्णिक व न्यायमूर्ती देशमुख यांनी आरोग्य विभागाला दिल्या.
सरकारी वकिलांनी आरोग्य सचिवांना सूचित करावे. जनतेच्या आरोग्यासारख्या प्रश्नात न्यायालयाने लक्ष घालावे लागणे चिंताजनक आहे, असे त्यांनी म्हटले आहे.
जिल्हा शल्यचिकित्सक सिंधुदुर्ग कार्यालयाने सकिँट बेंच समोर प्रतिज्ञापत्र सादर केले. त्यात ट्रामा केअर युनिट असल्याचा दावा केला. त्याचा पुरावा म्हणून काही फोटो जोडून सादर करण्यात आले.
अभिनव फाऊंडेशन सिंधुदुर्ग वतीने वकिल महेश राऊळ यांनी आरोग्य विभागाच्या दाव्याला हरकत घेतली. अँड राऊळ म्हणाले, ट्रामा केअर यूनिट करीता आवश्यक पाच तज्ञ डॉक्टरांची पदे रिक्त आहे. डॉक्टर नसतांना ट्रामा केअर युनिट जनतेला कशी सेवा देईल. अँड. राऊळ यांनी आरोग्य विभागाच्या भोंगळ कारभाराची पोलखोल केली. ते म्हणाले, रक्तपेढीसारख्या महत्त्वाच्या विभागाला रक्तसंक्रमण अधिकारी नाही. रक्तपेढीचा कार्यभार ऑर्थोपेडिक डॉक्टर सांभाळतात, हे कसे शक्य आहे. संपूर्ण रक्तपेढी कंत्राटी कर्मचारी यांच्यावर चालवली जाते. फक्त एकच कर्मचारी कायम आहेत. रक्तपेढी, रुग्णालय ही सेवा २४ तास सेवा आहे. ऐवढ्या मोठ्या प्रमाणात अधिकारी, कर्मचारी पदे रिक्त असतांना ट्रामा केअर युनिटची सेवा गोरगरीब जनतेला मिळेलच कशी? असा प्रश्न राऊळ यांनी उपस्थित केला.
ते म्हणाले, १९ पैकी बारा वैद्यकीय अधिकारी पदे रिक्त आहेत. दोन वैद्यकीय अधिकारी २०१५ पासून सतत गैरहजर आहेत. तरीही त्यांची नावे आस्थापनेवर आहेत. यासंदर्भात गेल्या दहा वर्षात कोणतीही कार्यवाही झालेली नाही.
अँड. राऊळ म्हणाले, १० कंत्राटी वैद्यकीय अधिकारी आणि आय.पी.एच. योजने अंतर्गत चार वैद्यकीय अधिकारी दाखवले आहेत. मात्र कंत्राटी दहा वैद्यकीय अधिकारी यांच्यापैकी बहुतेकांचे पत्ते नांदेड, संभाजीनगर, बीड, सोलापूर, औरंगाबाद असे आहेत. त्यांना कधी लोकांनी पाहिलेले नाही. ज्या डॉक्टरांची स्वतःची हाँस्पिटल आहेत; ते खासगी डॉक्टर शासकीय रुग्णालयाला वेळ कधी व कसा देतील? ही अत्यंत गंभीर बाब आहे. आरोग्य विभाग केवळ दिखावूपणा करत आहेत. याबाबत कोल्हापूर बेंचने गंभीर दखल घेत. सक्त सूचना दिला. यासंदर्भात पुढील सुनावणी शुक्रवारी २६ सप्टेंबर ला तारीख दिली आहे.
