मालवण ,दि.२८ फेब्रुवारी
राज्याचे मुख्यमंत्री एकनाथ शिंदे हे आंगणेवाडीच्या श्री भराडी देवीच्या यात्रेला येत असून ते भराडी देवीचे दर्शन घेतल्यानंतर मुख्यमंत्री एकनाथ शिंदे हे भाविकांशी संवाद साधणार आहेत यावेळी सिंधुदुर्ग जिल्हा शिवसेना, मालवण तालुका शिवसेना यांच्या वतीने त्यांचे उत्स्फूर्त स्वागत केले जाणार असल्याची माहिती शिवसेना कुडाळ मालवण विधानसभा प्रमुख बबन शिंदे यांनी पत्रकार परिषदेत दिली.
मालवण येथील हॉटेल रामेश्वर मध्ये आयोजित पत्रकार परिषदेत मुख्यमंत्र्यांच्या आंगणेवाडी यात्रा दौऱ्याबाबत माहिती देण्यात आली. यावेळी शिवसेनेचे उपजिल्हाप्रमुख विश्वास गांवकर, तालुकाप्रमुख राजा गांवकर, तालुकाप्रमुख महेश राणे, उपतालुकाप्रमुख पराग खोत, शहरप्रमुख बाळू नाटेकर, महिला उपाजिल्हाप्रमुख निलम शिंदे, देवबाग सरपंच उल्हास तांडेल, चाफेखोल सरपंच रविना घाडीगावकर, चंद्रकांत गोलतकर, उदय गावडे, दीपक मीठबावकर, अभिषेक कांदळगावकर, अश्विन हळदणकर, धिरज केळुसकर, कमलाकांत पाटकर, गीता नाटेकर, आशा वळपी, सुधीर चिंदरकर, अच्युत लोके, रुपेश करलर, उदय राऊत, निकिता तोडणकर, नेहा हळदणकर यांसह अन्य उपस्थित होते.
आंगणेवाडी यात्रे दिवशी दि. २ मार्च रोजी चिपी विमानतळ येथे मुख्यमंत्री एकनाथ शिंदे यांचे आगमन होणार आहेत. तेथून केंद्रीय मंत्री नारायण राणे यांच्या मालवण येथील निलरत्न निवासस्थानी ते रवाना होणार आहेत. त्यानंतर मुख्यमंत्री आंगणेवाडी येथे दाखल होऊन श्री भराडी देवीचे दर्शन घेणार आहेत. भाविकांशी संवाद साधतील. त्यानंतर आंगणेवाडी येथील शिवसेना कार्यालयात सिंधुदुर्ग जिल्हा शिवसेनेच्या वतीने मुख्यमंत्री एकनाथ शिंदे यांचा भव्य सत्कार होणार आहे, असे मुख्यमंत्र्यांच्या दौऱ्याचे स्वरूप असून अधिकृत दौरा माहिती प्रशासन स्तरावरून लवकरच जाहीर केली जाईल, असे यावेळी बबन शिंदे यांनी सांगितले. उद्योगमंत्री उदय सामंत, शिक्षण मंत्री दीपक केसरकर, लोकसभा संपर्क प्रमुख आमदार रवींद्र फाटक, शिवसेना नेते किरण सामंत यांच्या मार्गदर्शनाखाली मुख्यमंत्री यांचे उत्स्फूर्त स्वागत केले जाणार आहे, असेही बबन शिंदे यांनी सांगितले.
