सावंतवाडी दि.१५ ऑक्टोबर
पावसाळा असो, उन्हाळा असो वा हिवाळा, वृत्तपत्र विक्रेते भल्या पहाटे उठून वृत्तपत्र विक्रीचे काम चोख बजावतात. याच जिद्दीचं आणि अविरत सेवेचं मूर्तिमंत उदाहरण म्हणजे सावंतवाडी शहरातील ८५ वर्षीय ज्येष्ठ वृत्तपत्र विक्रेते अनंत माधव. गेली तब्बल ७० वर्षे ते सावंतवाडीकरांची सकाळ ताज्या बातम्यांनी करत आहेत आणि आजही वयाच्या या टप्प्यावरही त्यांचे हे व्रत अखंडपणे सुरू आहे. डॉ. ए.पी.जे अब्दुल कलाम यांच्या जन्मदिनी ‘वृत्तपत्र विक्रेता दिवस’ साजरा करत अशा विक्रेत्यांचे ऋण व्यक्त केले जातात.
माजगावचे रहिवासी असलेले अनंत माधव आजही मोठ्या उत्साहाने आणि निष्ठेने सावंतवाडीत येऊन वृत्तपत्र विक्रीचा आपला व्यवसाय करत आहेत. वयाच्या अवघ्या १५ व्या वर्षी त्यांनी या क्षेत्रात पाऊल ठेवले. सुरुवातीला कै. विनायक वाडकर यांच्याकडे विक्रेता म्हणून काम करत असताना त्यांनी पायी चालत वृत्तपत्र वितरणाला सुरुवात केली. त्यानंतर सायकलचा आधार घेतला आणि तब्बल ७० वर्षे सायकलवरून वृत्तपत्रांचे वितरण केले. मेहनत आणि प्रामाणिकपणाच्या बळावर १९७२ मध्ये त्यांनी सावंतवाडी बाजारपेठेत स्वतःचा स्टॉल सुरू केला. त्यांनी केवळ सावंतवाडीपुरते न राहता, वृत्तपत्र वितरणाची ‘पेपर लाईन’ माजगावसह लगतच्या गावांमध्ये नेऊन आपली सेवा विस्तारली. आजही त्यांची ही अविरत सेवा सुरू आहे, त्यांच्याकडे सध्या २ वितरक कार्यरत आहेत आणि मोठ्या प्रमाणात वृत्तपत्र विक्री त्यांच्या दुकानातून होते.
अनंत माधव आजही पहाटे लवकर स्टॉलवर पोहोचतात. सध्या मुलगा प्रसाद माधव सकाळी लवकर पोहचतो आणि पाठोपाठ अनंत माधव येतात. त्यांचा अनुभव आणि आठवणींचा खजिना मोठा आहे. वयाच्या ८५ व्या वर्षीही त्यांची कार्यक्षमता अनेकांना आश्चर्यचकित करते. रोज पहाटे उठून पेपर विक्री करणे हे आरोग्यासाठी उत्तम असल्याचे ते मानतात. आजही ते रिक्षातून शहरात येतात आणि पायी चालत दुकानापर्यंत जातात. त्यांच्या दुकानात ” रत्नागिरी टाइम्स” सर्व वृत्तपत्र यांसारख्या प्रमुख वृत्तपत्रांसह साप्ताहिक, मासिक अंक आणि दिवाळी अंक देखील उपलब्ध असतात. येथे मराठी आणि इंग्रजी दोन्ही भाषांतील वृत्तपत्रे मिळतात.
अनंत माधव आपल्या या यशाचे श्रेय आवर्जून कुटुंबियांच्या मोठ्या पाठिंब्याला देतात. त्यांच्या कुटुंबाच्या आधाराशिवाय हे शक्य झाले नसते, असे ते सांगतात. त्यांचा वारसा त्यांचे सुपुत्र प्रसाद माधव हे समर्थपणे पुढे नेत आहेत. प्रसाद माधव देखील गेली ४० वर्षे या व्यवसायात कार्यरत आहेत आणि वडिलांनी सुरू केलेला व्यवसाय नव्या उत्साहाने सांभाळत आहेत.
अनंत माधव यांचा ७० वर्षांचा हा प्रवास म्हणजे मेहनत, निष्ठा आणि जिद्द या मूल्यांची महती सांगणारा आहे. वयाच्या ८५ तही सेवा देणारा त्यांचा उत्साह आजच्या तरुण पिढीला प्रेरणा देणारा आहे. वृत्तपत्र विक्रेता दिनानिमित्त त्यांना हार्दिक शुभेच्छा!
