कणकवली दि.२९ ऑक्टोंबर
साळीस्ते येथे आढळलेला मृतदेह श्रीनिवास रेड्डी (५३, रा. बेंगलोर, कर्नाटक) यांच्या खूनप्रकरणी कणकवली पोलीस व एलसीबीच्या पथकाने कर्नाटकातून तिघांना अटक केली. त्या तीनही आरोपींना मंगळवारी मध्यरात्री कणकवली पोलीस ठाण्यात आणण्यात आले. त्यामध्ये सुभाष सुब्बारायप्पा (३२), नरसिंम्हा नारायण स्वामी मूर्ती (३६), मधूसुदन सिद्धप्पा तोकला (५२, सर्व रा. बेंगलोर-कर्नाटक) या आरोपींचा समावेश आहे. तिन्ही आरोपींना बुधवारी दुपारी ३ वाजण्याच्या सुमारास कणकवली न्यायालयात हजर करण्यात येणार आहे.
दरम्यान, या प्रकरणात पोलिसांच्या पथकाने एका आरोपीला बेंगलोरहून ताब्यात घेतले, असून त्याला घेऊन कणकवलीच्या दिशेने रवाना झाले आहे. पोलिसांकडून या प्रकरणात कमालीची गुप्तता ठेवण्यात आली असून अन्य आरोपींची संख्या वाढण्याची शक्यता वर्तवण्यात येत आहे. या प्रकरणाचा अधिक तपास सिंधुदुर्ग पोलीस करीत आहे.
