कणकवली दि .१३ जानेवारी(भगवान लोके)
सांगवे-कनेडी बाजारपेठ येथे गडग्याचे काम करण्यास अटकाव करत शिवीगाळ करुन धमकी दिल्याप्रकरणी नऊ जणांवर पोलिसांनी गुन्हा दाखल केला आहे. याबाबतची तक्रार प्राजक्ता गुरुदास कारेकर(रा. सांगवे, कनेडी बाजारपेठ )यांनी कणकवली पोलिस ठाण्यात नोंदविली आहे.
या तक्रारीत म्हटले आहे की, मी व माझे पती गुरुदास गोविंद कारेकर असे दोघेजणच सांगवे येथिल घरात राहतो. दोन मुलगे नोकरी निमित्त गोवा येथे असतात.११ जानेवारी २०२४ रोजी सकाळी ६.३० वाजण्याच्या सुमारास माझे पती हे जेसीबीच्या सहाय्याने घरालगत असलेल्या जमिनीमध्ये गडग्यासाठी चरी मारुन घेण्याचे काम करत होते. सकाळी ९ वाजण्याच्या सुमारास गडग्याच्या भिंतीचे बांधकाम करण्यासाठी मारुती चिंदरकर व त्यांचा मुलगा वैभव चिंदरकर आणि इतर दोघाना बोलावले होते. ३०,३५ चि-यांचे बांधकाम झाल्यानंतर १५ते २० माणसांचा घोळका आम्ही काम करत असलेल्या ठिकाणी आला. त्यामध्ये अभिजीत उर्फ प्रफुल्ल नंदकुमार काणेकर (२४,रा. कनेडी बाजार), विनोद सावंत (६०,रा. नाटळ विजयवाडी), प्रदिप उर्फ बाली सावंत (५५,रा.सांगवे), सुरेश सावंत (६५,रा. सांगवे), संदिप पवार (३५,रा. कनेडी बाजारपेठ), मयुर महादेव पवार (२४,रा. कनेडी), दिलीप चव्हाण (५०,रा.कनेडी), रायमन घोन्साल्वीस (५५,रा.सांगवे), चंद्ररतन कांबळे (५०,रा. सांगवे)
यांचा समावेश होता. त्या सर्वांनी आम्ही बांधकाम करत असलेल्या ठिकाणी येवून बेकायदेशीर जमाव करुन कामावर असलेल्या कामगारांना दमदाटी केली.तसेच त्यांना तेथून जाण्यास सांगितले. याबाबत मी व माझे पती यांनी त्यांना जाब विचारला असता त्यांनी आम्हास काम थांबवून चरी बुजवून टाकण्यास सांगितले. मी त्यांना मला माझे गडग्याचे बांधकाम करु द्या. असे सांगितले असता ते ऐकण्याच्या स्थितीत नव्हते. त्यांच्यापैकी विनोद सावंत व अभिजीत काणेकर यानी मला व माझे पती गुरुदास कारेकर यांना शिवीगाळी करुन, जी चरी तुम्ही मारली आहे ती बुजवून टाका. नाहीतर त्याचे परिणाम वाईट होतील अशा स्वरुपाची धमकी दिली. त्यानंतर ते सर्व तिथून निघून गेले.त्यामुळे त्यांच्याविरुद्ध माझी कायदेशीर तक्रार आहे.असेही म्हटले आहे.या घटनेचा अधिक तपास पोलिस करीत आहेत.
