मालवण,दि.८ मार्च
चौके – कुडाळ रस्त्यावरील धामापूर येथील श्री भगवती देवी मंदिरासमोरील उतार व वळणाच्या रस्त्यावर कुडाळच्या दिशेने भरधाव वेगाने जाणाऱ्या चिरे वाहतूक करणाऱ्या ट्रकने रस्त्यालगत असलेल्या दोन दुचाकीना धडक दिल्याने दोन्ही दुचाकी रस्त्यालगतच्या घळणीत कोसळल्याची घटना आज सायंकाळी ४ वाजता घडली. तर याच धडक बसलेल्या एका दुचाकीच्या धडकेने त्याठिकाणी उभ्या असलेल्या कुंदन सहदेव हुर्णेकर (रा. वायरी मालवण) हा देखील घळणीत कोसळल्याने तो जखमी झाला. या अपघातात कुंदन हुर्णेकर हा बालबाल बचावला. या घटनेनंतर ट्रक तेथून पळून गेला.
दरम्यान, काही तरुणांनी पळून गेलेल्या त्या ट्रकचा पाठलाग करून काळसे येथे ट्रक पकडला. मात्र, चालक झाडी झूडपात पळून गेला. पोलीस त्याचा शोध घेत होते.
चौके येथून चिरे भरलेला ट्रक (केए २२ सी ८३३४) चौके कुडाळ मार्गांवरून कर्नाटकच्या दिशेने निघाला होता. चौके – कुडाळ मार्गावर धामापूर येथील भगवती मंदिर समोरील वळणावर काही तरुण आपल्या दुचाकी रस्त्याच्या बाजूला उभ्या करून मंदिरात दर्शनासाठी गेले होते. यातील कुंदन हुर्णेकर हा मंदिरातून आपल्या गाडीच्या जवळ येत असताना चौकेच्या येथून येणाऱ्या सदर भरधाव ट्रकने तेथील रस्त्याच्या कडेला उभ्या असलेल्या एका दुचाकीला धडक दिली. ही दुचाकी कुंदनच्या अंगावर पडून कुंदन रस्त्याच्या कडेला असलेल्या छोट्या घळणीत फेकला गेला. त्याचवेळी ट्रकने कुंदन याच्याच उभ्या करून ठेवलेल्या बुलेट दुचाकीला धडक दिल्याने बुलेट रस्त्यालगतच्या घळणीत कोसळली. तर याच ठिकाणी प्रवाशांना बसण्यासाठी असलेल्या सिमेंट बेंचलाही ट्रकने धडक दिल्याने त्याचे तुकडे तुकडे झाले. त्या बेंचवर एक सेंट्रिंग कामगार बसला होता. तो काही मिनिटपूर्वी उठून निघून गेल्याने सुदैवाने तो बचावला. तर कुंदन याला मोठी दुखापत न झाल्याने तोही बालबाल बचावला. मात्र यामध्ये दोन्ही दुचाकीचे मोठे नुकसान झाले.
दरम्यान, अपघात घडल्यानंतर ट्रक काळसे कुडाळच्या दिशेने भरधाव वेगाने निघून जात होता. कुंदन तसेच तेथील काही युवकांनी दुचाकीने ट्रकचा पाठलाग केला. काळसे येथे काही अंतरावर एका वळणावर रस्त्याच्या बाजूला ट्रक मातीच्या चरात जाऊन अडकला. त्याचवेळी चालकाने झाडी झुडपाच्या दिशेने पळ काढला.
या अपघाताची माहिती मिळताच मालवण पोलीस निरीक्षक प्रवीण कोल्हे व सहकारी घटनास्थळी दाखल झाले होते. अपघातग्रस्त दुचाकींचा पंचनामा करण्यात आला. तसेच ट्रक चालकाचा शोध घेण्यात येत होता.
काळसे धामापूर मार्गावर सातत्याने अपघात होत असून यामध्ये भरधाव डंपर ट्रक यांच्यामुळे होणाऱ्या अपघातांची संख्या जास्त आहे. या भरधावं अवजड वाहनांना प्रशासनाने आवर घालण्याची मागणी स्थानिक ग्रामस्थांकडून होत आहे. तसेच अन्य उपाययोजना म्हणून धामापूर भगवती मंदिर समोरील रस्त्यावर स्पीड ब्रेकर घालावेत अशी मागणी होत आहे.
