मालवण,दि.१४ जानेवारी
अर्थनिर्मिती, NABCON, करीअर कट्टा आणि महाराष्ट्र शासनाच्या संयुक्त विद्यमाने मालवण येथील स.का.पाटील सिंधुदुर्ग महाविद्यालयात दोन दिवसीय “अर्थ निर्मिती : आर्थिक साक्षरता कार्यशाळा” संपन्न झाली. या कार्यशाळेत विद्यार्थ्यांना आर्थिम बचत, गुंतवणूक तसेच बँक व पोस्टाच्या विविध योजना याविषयी मार्गदर्शन करण्यात आले.
याप्रसंगी बिझनेस डेव्हलपमेंट -लर्निंग, चॉईस इक्विटी ब्रोकींग चे असिस्टंट व्हाईस प्रेसिडेंट प्रशांत आवटी, विनय दालमिया- चॉईस एक्विटी ब्रोकिंग, महाविद्यालयाचे प्राचार्य डाॅ. शिवराम ठाकूर, अंतर्गत हमी कक्ष समन्वयक प्रा. डॉ. सुमेधा नाईक आणि नवीन शैक्षणिक धोरण समन्वयक डॉ. उज्ज्वला सामंत उपस्थित होते.
कार्यशाळेच्या पहिल्या दिवशीच्या सत्रात महाविद्यालयाच्या प्राचार्यांनी प्रमुख पाहुण्यांचे स्वागत केले. मुख्य मार्गदर्शक प्रशांत आवटी यांनी आर्थिक सजगतेबाबत विद्यार्थ्यांना मार्गदर्शन केले. युवा वर्गाला बचतीबाबत प्रोत्साहन देण्यात आले. मासिक १०० रूपयांपासून आपण बचत करु शकतो असे सांगत बॅंक व पोस्ट यांच्या विविध योजनांची माहिती श्री. आवटी यांनी विद्यार्थ्यांना दिली. शेअर बाजार, म्युच्युअल फंड यातील गुंतवणूक करताना असणारी जोखीम व त्यासाठी घ्यावयाची काळजी याविषयी देखील मार्गदर्शन विद्यार्थ्यांना करण्यात आले. यावेळी प्रास्ताविक व सूत्रसंचालन डाॅ. सुमेधा नाईक यांनी केले तर आभार डॉ.उज्वला सामंत यांनी मानले.
दुसऱ्या दिवशीच्या सत्रात विद्यार्थ्यांना पॅन कार्ड, बँक अकाऊंट उघडून देण्याची मोफत सुविधा उपलब्ध करून देण्यात आली. ज्या ज्या विद्यार्थ्यांचे पँन कार्ड नाही, त्यांचे कार्ड काढून देण्यात आले. तसेच ज्यांना शेअर्स मध्ये गुंतवणूक करण्याची इच्छा आहे, त्यांना DMAT अकाउंट काढून दिली गेली. यासाठी प्रशांत आवटी, विनय दालमिया आणि त्यांच्या तांत्रिक विभागाच्या सहकाऱ्यांनी विद्यार्थ्यांना मदत केली. तसेच विद्यार्थी आणि प्राध्यापक यांनी अर्थ निर्मिती पात्रता प्रश्न मंजुषा ऑनलाईन सोडवली, त्यांना प्रमाणपत्रे प्राप्त झाली. या कार्यशाळेचा लाभ महाविद्यालयाच्या आर्ट्स, कॉमर्स आणि विज्ञान विभागाच्या सर्व विद्यार्थ्यानी, तसेच शिक्षक व शिक्षकेतर कर्मचारी यांनी घेतला. या कार्यशाळेचे नियोजन डॉ उज्वला सामंत, डॉ. सुमेधा नाईक आणि सर्व विभाग प्रमुखांनी केले.
