मालवण,दि.१३ मार्च
गेली १६ वर्षे महाराष्ट्र राज्यातील अपरिचित गडकोटांच्या संवर्धनासाठी कार्यरत असलेल्या आणि सिंधुदुर्ग जिल्ह्यातील रामगड व भगवंतगड किल्ल्यासाठी कार्य करणाऱ्या दुर्गवीर प्रतिष्ठान या संस्थेतर्फे गडकोट संवर्धनासोबत विविध सामाजिक, शैक्षणिक उपक्रम संस्थेच्या मार्फत राबविले जातात. याचाच एक भाग म्हणून CSR प्रोजेक्ट अंतर्गत मॉर्निंग स्टार कंपनीच्या माध्यमातून अनेक जिल्ह्यातील गडघे-यातील शाळांमध्ये टप्प्याटप्प्याने लॅपटॉप वाटप सुरू आहे. सिंधुदुर्ग जिल्ह्यातील लॅपटॉप मागणी केलेल्या ३० शाळांना त्यांच्या पटसंख्येनुसार ६० लॅपटॉपचे वितरण मालवण तालुक्यातील रामगड हायस्कूल येथे करण्यात आले.
यावेळी दुर्गवीर प्रमुख श्री. संतोष हासुरकर यांनी प्रास्ताविकामध्ये संस्थेच्या कार्याची माहिती देत दुर्गवीर प्रतिष्ठान सोबत गडकिल्ले संवर्धन कार्यात सहभागी होण्यासाठी आवाहन केले. ग्रामीण भागातील मुलांना आधुनिक साहित्य उपलब्ध व्हावे जेणेकरून त्यांच्या सर्वांगीण विकासासाठी हातभार लागेल आणि भावी पिढी डिजिटली साक्षर होण्यास मदत होईल, हा लॅपटॉप वितरण करण्यामागचा हेतू आहे, असे श्री. हासुरकर यांनी सांगितले. यावेळी शिक्षकांच्या वतीने दुर्गवीरप्रमुख श्री. संतोष हासुरकर यांच्या सह इतर दुर्गवीरांचा सन्मान करण्यात आला.
यावेळी व्यासपीठावर रामगडचे सरपंच शुभम मठकर, दुर्गवीर प्रतिष्ठानचे अध्यक्ष संतोष हासुरकर, अभय प्रभुदेसाई, रामगड हायस्कूलचे शिक्षक श्री. वळंजू, रामगड शाळा संस्था उपाध्यक्ष सुभाष तळवडेकर, जिल्हा मुख्याध्यापक संघाचे अध्यक्ष वामन तर्फे, दुर्गवीर सचिव सागर टक्के, खजिनदार सुरेश उंदरे, सिंधुदुर्ग जिल्हा समन्वयक अर्जुन दळवी, रत्नागिरी जिल्हा समन्वयक प्रशांत डिंगणकर, दुर्गवीर सदस्य महेश सावंत, प्रमोद डोंगरे आदी मान्यवर उपस्थित होते. हा कार्यक्रम यशस्वी होण्यासाठी दुर्गवीर प्रतिष्ठानच्या सिंधुदुर्ग विभागातील सर्व सदस्यांनी मेहनत घेतली.
